L'opziun e la visiun Porta Alpina restan avertas per il futur

Il Grischun ha desistì ad interim da realisar la Porta Alpina. Quest conclus ha la regenza prendì ils 11 da settember 2007 ensemen cun la regiun Surselva e cun la vischnanca da Tujetsch sco instituziun ch'era responsabla per il project. Ils motivs per suspender il project eran las ristgas ch'il project chaschunava areguard la tecnica, areguard il manaschi, ma cunzunt er areguard las finanzas; questas ristgas n'èn betg stadas supportablas per il chantun, per la regiun e per la vischnanca senza ina participaziun segira da la confederaziun e senza il cler consentiment da las Viafiers federalas (VFF). L'opziun Porta Alpina duai dentant restar averta per ina generaziun futura.

Suenter avair examinà il stadi dal project, las novas cundiziuns generalas ed il fatg che las schanzas da realisaziun eran sa midadas, era l'instituziun responsabla per il project vegnida a la conclusiun ch'i fiss daventà ina ristga betg supportabla da cuntinuar cun il project Porta Alpina che dueva oriundamain vegnir construì a medem temp sco il tunnel da basa dal Gottard. Questa conclusiun era resultada d'ina vart, perquai ch'il cussegl federal aveva suspendì gia il matg 2007 la decisiun da finanziaziun e da l'autra vart perquai che las VFF avevan prendì posiziun il cumenzament da settember 2007 davart in'eventuala purschida minimala areguard il manaschi. 

Motivs per la renunzia ad interim

Il cussegl federal aveva concludì gia il matg 2007 da suspender la decisiun davart la contribuziun da finanziaziun per la Porta Alpina fin l'onn 2012 e da sistir la procedura d'approvaziun dal plan, ch'era pendenta tar l'uffizi federal da traffic (UFT). Uschia avess la Porta Alpina pudì vegnir averta il pli baud trais onns suenter ch'il tunnel da basa dal Gottard fiss stà terminà. Las diversas sinergias ed ils divers respargns da custs ch'ins avess pudì trair a niz cun realisar a medem temp ils projects, fissan dentant crudads davent ed avessan augmentà sproporziunadamain ils custs da la Porta Alpina. Ina prefinanziaziun da las proximas ulteriuras investiziuns cun meds finanzials dal chantun n'è betg vegnida en dumonda per motivs giuridics e finanzials. Las votantas ed ils votants dal Grischun avevan numnadamain permess il credit chantunal da 20 milliuns francs mo sut la cundiziun ch'er la confederaziun sa participeschia finanzialmain al project. Dal puntg da vista tecnic-architectonic na fissi betg stà pussaivel da realisar pli tard - pia pir suenter ch'il tunnel da basa dal Gottard è vegnì avert - la Porta Alpina tenor il concept actual (utilisaziun da la fora existenta per l'ascensur da persunas). Anzi, i stuess vegnir tschertgada ina nova soliziun tecnica ch'è dentant cumbinada cun gronds custs supplementars.

Il rapport da studi, cun il qual èn vegnidas incumbensadas las VFF, ha bain confermà ch'ina purschida minimala per la Porta Alpina saja da princip pussaivla sin basa da la purschida centrala dal svilup futur da l'infrastructura da viafier (SIV) senza perditas per il trassé. Ma il studi è arrivà a la conclusiun ch'ina tala purschida na possia betg esser rentabla. A las VFF stuessan vegnir indemnisads mintga onn summas da milliuns per trens supplementars. Questa ristga finanziala supplementara che reulta dal manaschi n'è la finala betg stada supportabla per l'instituziun responsabla resp. pli tard per la gestiunaria.

Grazia ad investiziuns preliminaras resta l'opziun Porta Alpina averta 

Pervia da questas novas cundiziuns generalas n'è la Porta Alpina betg pli stada realisabla per l'instituziun responsabla en il rom finanzial, tecnic e funcziunal ch'era planisà oriundamain. Bain è vegnida manchentada uschia ina schanza per la regiun e per il chantun ed ultra da quai in'attracziun turistica singulara per l'entira Svizra. Ma las investiziuns preliminaras, sco p.ex. las hallas da spetga ch'èn gia vegnidas exchavadas, n'èn betg persas. Pli tard ina giada, cur ch'i èn er avant maun experientschas fundadas cun il manaschi dal tunnel da basa dal Gottard, pudess ina proxima generaziun puspè laschar reviver la visiun, e quai cun il concept nov, forsa in pau pli generus.

Ulteriuras infurmaziuns davart la Porta Alpina chattais Vus qua.